ታሪካዊን ጥንታውን ገዳም ደብረማሪያም ቖርቖር ሓደጋ ምፍራስ ኣጋጢምዎ ።
አብ ወረዳ ሓውዜን ቑሸት ቖርቖር ዝርከብ ታሪካውን ጥንታውን ዓብይ ገዳም ደብረማሪያም ቖርቖር ሓደጋ ምፍራስ ከምዘጋጠሞ ነበርቲ እቲ ከባቢን መሀወፅትን ንድወት ሓቢሮም።
እቲ ሓደጋ 22 ነሓሰ 2016ዓ/ም ዘጋጠመ ኮይኑ ብዘይካ አብ ልዕሊ እቲ ገዳም ኣብ ልዕሊ ህዝቢ ዘብፅሖ ሓደጋ ከምዘየለ ድማ ሓቢሮም።
ገዳም ደብረማሪያም ቖርቖር ቕድሚ ሐዚ ነቓዕ ኣጋጢምዎ ፀኒሑ፣ ኣብቲ እዋን ኩናት ከቢድ ብረት አብቲ ጥቅኡ ዓሊብዎ ከምዝነበረን ዝሓበሩ እቶም ንድወት ሪኢቶም ዝሃቡ ወገናት ሐዚ ድማ ምስቲ ሓያል ዝናብ ተወሲክዎ ክፈርስ ከምዝክኣለ ግምታት ኣለዉ ክብሉ ሓቢሮም።
ነቲ ገዳም ብርክት ዝበሉ ሃወፅቲ ውሽጢ ዓድን ወፃእን እናመፁ ይህውፅዎ ዝነበሩ እንትኮኑ ሐዚ ግና እቲ ገዳም ብምፍራሱ ስዒቡ ኣብ ዝከፍአ ብርኪ ስለ ዝርከብ ዝምልከቶም ኣካላት ብህፁፅ ፍታሕ ከናድይሉ ፃውዒት ቀሪቡ ኣሎ።
